Geysir í Haukadal : breytingar á rennsli og yfirborðshita vegna dælingar í Neðridal og Kjarnholtum 2005

Abstract

Dælt var úr borholu í Neðridal frá 9. júní til 3. ágúst 2005 og úr borholu í Kjarnholtum frá 5. október til 7. desember 2005. Fylgst var með hvort áhrif yrðu á yfirborðshita á Geysissvæðinu þennan tíma sem unnt væri að heimfæra með vissu upp á dælingar úr borholunum. Slíkar breytingar þurfa að vera meiri en náttúrulegar breytingar vegna veðurfars. Ekki urðu breytingar á gostíðni í Geysi og Strokki vegna dælingar í nágrenninu, enda var fremur lítlu magni dælt um borholurnar. Engar breytingar komu fram á yfirborðshita sem rekja mátti með vissu til dælinga úr borholum í nágrenni Geysissvæðisins. Erfitt er að meta hvort langtímaáhrif myndu koma fram á yfirborðshita á Geysissvæðinu ef dæling stæði yfir mánuðum saman. Miðað við það magn sem dælt var þetta tímabil virðist sem sú hætta sé lítil, þ.e.a.s. ef dæling í Neðridal fer ekki yfir 4–5 l/s og 3 l/s í Kjarnholtum.

Miðað við þau áhrif sem urðu á vatnsborði í borholum í Helludal vegna dælinga í Neðridal má eiga von á áhrifum á yfirborðshita á Geysissvæðinu ef hámarksdæling er notuð í Neðridal eða ef vatnsborð þar er dregið mjög langt niður.

Ef ákveðið verður að nýta borholur í nágrenni við Geysi er nauðsynlegt að fylgjast náið með jarðhita á Geysissvæðinu. Dæling úr jarðhitakerfum í langan tíma hefur áhrif á jarðhitakerfin og aðeins vöktun getur svarað þeirri spurningu hvort dæling í langan tíma hafi merkjanleg áhrif á yfirborðshitann.

Geysissvæðið er það dýrmætt svæði að enga áhættu má taka vegna nýtingar á heitu vatni í nágrenni þess.