Mat á starfi Barnaheimilisins Óss

Abstract

Í þessari skýrslu er gerð grein fyrir mati á starfi Barnaheimilisins Óss í Reykjavík. Matið tók mið af þeim þáttum sem tilgreindir voru í verksamningi milli Rannsóknarstofnunar KHÍ, nú SRR og menntamálaráðuneytis í nóvember 2006. Á grundvelli hans var kannað hvort starfsemi leikskólans væri í samræmi við ákvæði laga, reglugerðar og aðalnámskrá leikskóla. Matið leiðir í ljós að mörgum þáttum er vel sinnt. Smæð leikskólans og rekstrarform hans skapa honum ákveðna sérstöðu sem leiðir til þess að foreldrar hafa töluverð áhrif á starfið og að ákveðið traust og virðing ríkir á milli foreldra og starfsmanna. Meginkostir leikskólans felast í góðum starfsanda og jákvæðum samskiptum á milli starfsmanna, barna og við börn og foreldra. Vel er haldið utan um daglegt skipulag og öll verkaskipting er skýr. Þá eru foreldrar mjög ánægðir með það starf sem fram fer í leikskólanum. Helstu veikleikar felast í ómarkvissri skráningu á markmiðum og leiðum í leikskólastarfinu, húsnæði, lóð og starfsmannaaðstöðu. Mikilvægt er að þróa skólanámskrá þannig að fram komi hvernig leikskólinn ætlar að uppfylla markmið aðalnámskrár leikskóla og um leið Hjallastefnunnar. Vinna þarf markvissar að því að skrá og meta leikskólastarfið.