Áhrif rasisma í stjórnmálum framtíðarinnar

Abstract

INNGANGUR Í þessu verkefni er ætlunin að skoða hvort líklegt sé að rasismi verði mikilvægt afl í stjórnmálum á Íslandi í framtíðinni. Til þess að hægt sé að átta sig á því verður skoðað hvað felist í kynþáttahyggju og kynþáttafordómum. Þróun innflytjendamála á Íslandi verður skoðuð og áhrif hennar á efnahagslíf og menningu. Einnig verður reynt að meta hvort kynþáttahyggja og kynþáttafordómar séu til hér á landi og í hvaða mynd þeir birtast. Stefna stjórnvalda hefur óneitanlega áhrif á þróun innflytjendamála og verður hún metin og áhrif hennar skoðuð. Í seinni hluta verkefnisins verður umræðan um innflytjendamál í íslenskum stjórnmálum skoðuð og þróunin hér á landi borin saman við þá þróun sem hefur orðið víða í Evrópu. Í lokin verður svo reynt að meta hvort hætta sé á að Ísland lendi í sömu forapyttum og aðrar þjóðir þegar kemur að málefnum innflytjenda, og um leið reynt að svara spurningunni um hvort líklegt sé að rasismi skjóti hér rótum og verði mikilvægt afl í stjórmálum Íslands þegar til framtíðar er litið.