Rannsóknir og vöktun á náttúru Breiðafjarðar. Niðurstöður sérfræðingafundar í Stykkishólmi , 12.-13. september 2007.

Abstract

Breiðafjörður er víðáttumesta grunnsævis- og fjörusvæði landsins og er þar að finna auðugt lífríki ofan sjávar og neðan. Hér er fjallað er um afrakstur tveggja daga fundar, sem haldinn var í Stykkishólmi dagana 12. og 13. september 2007. Þar komu saman 24 sérfræðingar um lífríki Breiðafjarðar til að ræða eyður í þekkingu og leggja línur um æskilegar rannsóknir. Bæta þarf verulega þekkingu á grundvallarþáttum í lífríki Breiðafjarðar og undirstöðum þess. Niðurstaða fundarins var því að leggja til að ráðist verði í tvö viðamikil undirstöðuverkefni sem allra fyrst. Annað þeirra felur í sér kortlagningu á botni og fjörum Breiðafjarðar með hliðsjón af umhverfisþáttum, botngerð og samfélögum. Hitt felur í sér að rannsaka uppruna og afdrif kolefnis í firðinum, þ.e. orku- og næringarefnaflæði í gegnum fæðukeðjur. Fjallað er um mun fleiri verkefni og er þeim forgangsraðað í þrjá flokka. Áhersla er lögð á að stórefla rannsóknir á Breiðafirði, enda eru þær undirstaða sjálfbærrar nýtingar og munu jafnframt nýtast á öðrum svæðum.