#

Samkeppni á bankamarkaði.

Skoða fulla færslu

Titill: Samkeppni á bankamarkaði.Samkeppni á bankamarkaði.
URI: http://hdl.handle.net/10802/5555
Útgefandi: Samkeppniseftirlitið
Útgáfa: 2011
Ritröð: Samkeppniseftirlitið., Ritröð Samkeppniseftirlitsins ; 1/2011
Efnisorð: Samkeppni í viðskiptum; Bankar
Tungumál: Íslenska
Tengd vefsíðuslóð: http://www.samkeppni.is/media/skyrslur-2011/Umraeduskjal_1_2011_Samkeppnishomlur_a_bankamarkadi.pdf
Tegund: Bók
Gegnir ID: 991004301629706886
Athugasemdir: Umræðuskjal
Myndefni: línurit, töflur
Eitt af því sem ráða mun úrslitum við endurreisn íslensks atvinnulífs er það hvernig fjármálastarfsemi verður háttað hér á landi. Aðstæður á fjármálamarkaði skipta miklu máli um það hvernig atvinnulífi og einstaklingum tekst að byggja tilvist sinni og framþróun traustan grundvöll.

Mikil breyting hefur orðið á umfangi og eðli bankastarfsemi hér á landi í kjölfar bankahrunsins. Starfsemi íslenskra banka er nú nær eingöngu á innanlandsmarkaði og verður enn sem komið er ekki talin til hefðbundinnar viðskiptabankastarfsemi. Bankarnir hafa verið að endurskipuleggja útlánasöfn sín og mun sú vinna verða drjúgur hluti af starfseminni á næstu árum. Jafnframt blasa við þrengri tekjumöguleikar á markaði, mannfrek verkefni á sviði fjárhagslegrar endurskipulagningar rekstrarfélaga og auknar kröfur stjórnvalda til banka í kjölfar hrunsins.

Þátttakendur á fjármálamarkaði og stjórnvöld eru óhjákvæmilega að móta stefnu til framtíðar með hliðsjón af nýjum efnahagslegum veruleika. Þessir aðilar, þ. á m. viðskiptabankarnir þrír sem tóku við innlendum verkefnum föllnu bankanna, þ.e. Arion banki hf., Íslandsbanki hf. og NBI hf., hafa m.a. verið að velta fyrir sér möguleikum á samrunum banka á innanlandsmarkaði.

Samþjöppun í bankakerfinu er meiri nú en verið hefur í áratugi og má búast við áhuga á frekari samrunum, bæði vegna slæmrar stöðu fjármálafyrirtækja og þess möguleika sem samruni er talinn gefa á hagræðingu á fjármálamarkaði. Fjármálafyrirtækjum er enn að fækka, nú síðast með sameiningu SpKef og Landsbankans í mars 2011. Neyðarlögunum frá því í október 2008 var beitt við þann samruna þannig að hann féll ekki undir samrunaákvæði samkeppnislaga.

Þá hafa samkeppnisaðstæður á fjármálamarkaði að öðru leyti komið til umfjöllunar Samkeppniseftirlitsins á síðustu misserum. Ljóst er að þær aðstæður sem nú ríkja á íslenskum fjármálamarkaði vekja ýmsar spurningar, m.a. um möguleika nýrra og smærri fjármálafyrirtækja til að hasla sér völl á markaðnum.

Markmið Samkeppniseftirlitsins með umræðuskjali þessu er að gefa vísbendingar um samkeppnislega stöðu á fjármálamarkaði við þær aðstæður sem nú ríkja, kynna almenn sjónarmið Samkeppniseftirlitsins um samruna á fjármálamarkaði og hvetja stjórnvöld og aðra hagsmunaaðila til að gefa samkeppnismálum gaum við stefnumótun fjármálamarkaðarins. Er umræðuskjalinu einnig ætlað að leggja frekari grunn að stefnumörkum Samkeppniseftirlitsins varðandi fjármálamarkaðinn og mögulegar aðgerðir þess ef tilefni verða til.

Í umræðuskjali þessu er sjónum fyrst og fremst beint að viðskiptabönkum og sparisjóðum en í gegnum tíðina hafa athuganir Samkeppniseftirlitsins á fjármálamarkaði að mestu beinst að þjónustu banka við heimili og lítil og meðalstór fyrirtæki. Þrátt fyrir þetta er í umræðuskjali þessu eftir atvikum notað hugtakið fjármálamarkaður, sem hefur víðari skírskotun en bankamarkaður, og sömuleiðis hugtakið fjármálafyrirtæki sem samheiti viðskiptabanka, sparisjóða, annarra lánafyrirtækja og verðbréfafyrirtækja. Í umræðuskjalinu er heitið Landsbankinn jafnan notað í stað NBI.

Í niðurstöðukafla í upphafi umræðuskjalsins eru tekin saman þau atriði sem Samkeppniseftirlitið telur mestu skipta um viðfangsefni skýrslunnar auk þess sem óskað er eftir sjónarmiðum fjármálafyrirtækja og annarra hagsmunaaðila. Því næst eru tveir kaflar um alþjóðlega þróun; fjallar annar um umræðu um banka og samkeppni í kjölfar fjármálakreppunnar og hinn um talnagögn um stærð banka og samþjöppun á hinum ýmsu bankamörkuðum. Þá koma þrír kaflar um íslenska bankamarkaðinn; hinn fyrsti lýsir nýjum aðstæðum á markaði, fækkun fyrirtækja og starfsemi bankanna; hinn næsti fjallar um einkenni fjármálamarkaða og hinn síðasti um markaðshlutdeild og samþjöppun á bankamarkaði. Að lokum er lýsing á ákvörðunum Samkeppniseftirlitsins sem varða bankamarkað frá hruni.

Umfjöllun í þessu umræðuskjali um samruna viðskiptabanka og önnur samkeppnisleg álitaefni byggist á frummati Samkeppniseftirlitsins á fyrirliggjandi upplýsingum. Í umfjöllun þessari felst því engin bindandi afstaða til neinna atriða sem tengjast ákvæðum samkeppnislaga og framkvæmd þeirra. Tilgangur þessa skjals er að kalla fram hugmyndir og skoðanaskipti um atriði sem eflt geta samkeppni á fjármálamarkaði og þar með hraðað uppbyggingu atvinnulífsins.


Skrár

Skrá Stærð Skráartegund Skoða
Umraeduskjal_1_ ... shomlur_a_bankamarkadi.pdf 1.339Mb PDF Skoða/Opna

Þetta verk birtist í eftirfarandi flokki:

Skoða fulla færslu

Leita


Fletta