Íslenski hesturinn: stuðningur ríkis, stjórnsýsla og félagslegt bakland

Abstract

Í þessu skjali er að finna umfjöllun um starfsemi og stuðning á vegum ríkisins er snýr að málefnum hestamennsku og íslenska hestsins. Verkið er unnið af Bjarna Snæbirni Jónssyni fyrir mennta-og menningarmálaráðuneyti og sjávarútvegs-og landbúnaðarráðuneyti. Í verksamningi er áskilið að gera skuli úttekt á opinberum stuðningi og umgjörð stjórnsýslu tengda íslenska hestinum, en auk þess kortlagningu á hagsmunum, félagsstarfi og útlistun á ýmsum álitamálum sem tengjast málefninu Verkið var fyrst og fremst unnið út frá fyrirliggjandi upplýsingum um fjárframlög og kostnað ríkisins. Reynt var að takmarka gagnaöflun sem mest við það sem var hægt að tengja málefninu með tiltölulega skýrum hætti. Það er ljóst, að hagsmunir af starfsemi í kringum íslenska hestinn liggja víða og eru hagrænir og viðskiptalegir hagsmunir umtalsverðir. Úttekt á heildarmyndinni að því er þetta varðar er vissulega áhugaverð, en er ekki hluti af þessu verkefni. Fyrst og fremst er reynt að varpa ljósi á stjórnsýslu-og hagsmunatengsl til þess að gefa mynd af umfangi málaflokksins. Fjallað verður um ýmis álitamál sem komu fram við gerð þessarar úttektar og hafa komið fram í samtölum á ýmsum stigum hennar, en ekki eru gerðar beinar tillögur um breytingar. Að mati höfundar þarf slíkt að koma í kjölfar umræðu meðal þeirra sem málið varðar.