Jarðhitaleit í Svarfaðardal árin 2000-2001 : Niðurstöður rannsókna og úrvinnsla gagna

Abstract

Teknar eru saman helstu niðurstöður jarðhitaleitar í Svarfaðardal á árunum 2000 og 2001. Rannsóknirnar beindust einkum að Laugahlíð og nágrenni Húsabakkaskóla. Fyrst var gert sprungukort á grundvelli jarðskjálftagagna Veðurstofunnar og leitað að virkum jaðskjálftasprungum. Í framhaldi af því voru boraðar 7 hitastigulsholur. Síðan voru gerðir líkanreikningar til að meta líklegan hita djúpt í aðfærsluæðum lauganna í dalnum. Niðurstöður rannsóknanna urðu neikvæðar. Kortlagning smáskjálfta og sprungna og hitastigulsboranir gáfu hvorki vísbendingar um lekar sprungur né uppstreymi heits vatns umfram það sem þekkt er í Laugahlíð. Efnagreining úr nýju sýni úr holu LA-1 í Laugahlíð bendir til þess að vatnið þar hitni ekki verulega með dýpi. Bestu kostirnir til að kanna hvort heitara vatn sé að finna á svæðinu eru að dýpka holu SD-6 eða bora dýpri holu í Laugahlíð. Þá mætti kanna hagkvæmni hitaveitu frá jarðhitasvæðinu við Hamar.