Niðurstöður kornastærðarmælinga á áreyrasýnum frá Þjórsá milli Sóleyjarhöfða og Svartár

Abstract

Í þessari skýrslu er fjallað um kornastærðargreiningar á 40 áreyrarsýnum sem tekin voru þann 24. júní 2003 í Þjórsá milli Sóleyjarhöfða og Svartár. Sýnin voru tekin ýmist ástreymis, hlémegin eða nálægt miðri eyri. Efnið í áreyrunum er aðallega möl og sandur og eru sýnin sem tekin voru ástreymis, heldur grófari en sýnin sem tekin voru hlémegin á áreyrunum sérstaklega í efstu sýnunum nálægt Sóleyjarhöfða. Fyrir neðan Eyvafen eru áreyrarnar töluvert grófari með steinum og hnullungum allt að 1 m í þvermál, en þar sem grófasta efninu var ekki safnað eru afleiddir kornastærðareiginleikar s.s. meðalstærð, ekki mjög frábrugðnir fyrir þessi sýni miðað við sýni ofar í ánni. Fyrir neðan Eyvafen er jarðgrunnurinn annar en þar fyrir ofan; miklir jökulruðningsflákar með misgrófu efni sem útskýrir að öllum líkindum grófleika áreyranna á þessu svæði.