|
Útdráttur:
|
Í skýrslunni er fjallað um niðurstöður rennslis-, svifaurs- og skriðaursmælinga sem fram fóru í Jökulsá á Dal árið 2002. Við Hjarðarhaga voru eftirtalin atriði rannsökuð: 1) Niðurstöður rennslimælinga og breytileiki farvegar með rennsli, 2) samanburður kornastærðarmælinga svifaurssýna af rafdrifnum kláfi og af brú, 3) samband svifaursstyrks og rennslis, 4) breytileiki skriðaursframburðar innan farvegar og með rennsli, og 5) hlutur skriðaursframburðar af heildaraurframburði. Einnig voru borin saman svifaurssýni frá Hjarðarhaga og bænum Brú. Rennslislykill nr. 8 hefur verið búinn til út frá niðurstöðum rennslismælinganna en dýpi farvegarins jókst heldur með rennsli. Styrkur heildarsvifaurs og allra kornastærðarflokka var hærri í flestum kláfsýnum en munurinn var minni fyrir fíngerðara efni, sem einnig sýndi verri fylgni við rennsli. Mikill breytileiki var á framburði skriðaurs á hverri stöð, sem og á milli stöðva og barst minnst fram á 20, 30 og 80 m, en mun meira á 40-70 m. Á öllum stöðvum jókst framburður skriðaurs með hækkandi rennsli. Heildarframburður skriðaurs var 7-76 kg/s við meðalrennslið 184-423 m3/s, sem var 6-13% af heildaraurframburði. |
