Afkoma Hofsjökuls 1997-2004

Abstract

Afkoma Hofsjökuls hefur verið mæld samfellt síðan 1988. Á því tímabili hefur veðurfar sveiflast frá því sem líkist litlu ísöld (1989, 1992 og 1993) í eitt hlýjasta tímabil Íslandssögunnar á allra síðustu árum. Auk þess hefur öskufall öðru hverju haft umtalsverð áhrif á afkomu Hofsjökuls, einkum 1991. Ársafkoma jökulsins hefur verið jákvæð um 1,5 m þegar mest hefur verið en neikvæð um 1,5 m þegar jökullinn hefur rýrnað mest. Borað var í hábungu jökulsins 1991. Afkomumælingar fram til þess tíma samræmast vel niðurstöðum úr ískjarnanum. Mælingar með snjósjá (radar) virðast sýna bæði síðustu hausthvörf og vatnsborð í jöklinum. Skafrenningur jafnar snjó á jöklinum eftir landslagi en hefur ekki umtalsverð áhrif á heildarafkomu jökulsins. Að meðaltali hefur veturinn bætt 1,5-1,7 m við jökulinn en sumarið rýrt hann um 2,0-2,2 m þau 17 ár sem mælingarnar hafa staðið.