Niðurstöður rennslis-, aurburðar- og efnamælinga í Skeiðarárhlaupi haustið 2004

Abstract

Hlaup hófst í Skeiðará 29. október 2004 og hófst eldgos í Grímsvötnum fjórum dögum síðar. Skeiðará var rennslismæld í sjö skipti í hlaupinu og ferill hlauprennslis reiknaður. Hlaupið náði hámarki 2. nóvember og fór rennsli í rúmlega 3300 m3/s en var komið niður í tæplega 500 m3/s 4. nóvember. Fram upphafi hlaups og fram á kvöld 3. nóvember var heildarrúmmál hlaupvatns um 0,45 km3. Jarðhitaættað vatn virðist hafa runnið í Skeiðará fram í byrjun desember og er heildarvatn í hlaupinum um 0,8 km3 ef þetta vatn er talið með. Tíu svifaurssýni voru tekin dreift yfir hlauptoppinn og var stærstur hluti þeirra af kornastærðinni mélu (0,002-0,02 mm). Heildarframburður svifaurs var 4 milljónir tonn í kringum hlauptoppinn en 4,9 milljónir tonn ef framburður var framreiknaður fram í desember. Efnasýni voru tekin frá 30. október til 4. nóvember og voru ákveðnir þættir mældir á staðnum en aðrir á rannsóknastofu. Heildarstyrkur uppleystra efna jókst frá upphafi mælinga og fram yfir flóðtopp fyrir utan í einu sýni, en féll eftir það. Greinileg eldgosaáhrif mældust í vatninu eftir að flóðtoppur kom fram.