Handbók um hugarfar kúa : skáldfræðisaga

Abstract

Ungur menningarfræðingur snýr heim eftir strangt nám í útlöndum. Á ráðningarstofum er horft á hann með hluttekningu og hann spurður hvort hann hafi "komið eitthvað fram"? Að lokum fær hann þó í gegnum klíku það verkefni að gera handrit að heimildarmynd um íslensku kúna fyrir Bændasamtök Íslands. Smám saman rennur upp fyrir hinum metnaðarfulla menningarfræðingi að virðingarstaða kúa speglar hugarfar manna á hverjum stað og hverjum tíma. Jafn einkennilega og það kann að hljóma, falla slíkar tengingar ekki í kramið hjá forkólfum heimildarmyndarinnar. Eftir óhuggulegt atvik í Hvalfirði, þar sem maður með stóra hunda kemur við sögu, verða kenningar um kýr og menn allsráðandi í hugarfjósi kúfræðingsins. Handbók um hugarfar kúa er önnur skáldsaga Bergsveins Birgissonar, en árið 2003 kom út hjá Bjarti skáldsagan Landslag er aldrei asnalegt og var hún tilnefnd til Íslensku bókmenntaverðlaunanna. Handbókin er ómissandi öllum þeim sem vilja kynnast eigin bási í hinu magnaða hugarfjósi.