Fuglalíf í fjarðarbotnum á Austfjörðum 1998

Abstract

Sumarið 1998 fór í gang athugun á fuglalífi í fjarðarbotnum á útvöldum stöðum á Austurlandi á vegum Náttúrustofu Austurlands í Neskaupsstað. Farið var á svæðin og gerð úttekt á fuglum og þeir taldir.

Strandlengja Austurlands er löng og fjölbreytileg að útliti og lífríki og henni tilheyrir fuglalíf sem er misjafnlega mikið vitað um. Athuganir á fuglalífi sem er bundið við fjarðarbotna og leirur í þeim er einn liður í því að nálgast heilsteypta mynd af fuglalífi strandlengjunnar. Vottur af leirum eru í botnum voga og víka líkt og aðalleirur eru í botnum fjarða. Þessar leirur myndast þar sem straumar ferskvatns og sjávar mætast og þar sem sjór færir botnfall, grugg og ýmislegt í hlé strandar. Á svipaðan hátt myndast straumvatnseyrar í árósum.

Í upphafi þessa verks eru tekin fyrir til skoðunar fjögur athugunarsvæði sem öll eru nærri þéttbýli manna. Nauðsynlegt er þó að hafa önnur lík svæði til samanburðar þar sem byggð er strjál eða engin. Þau svæði sem valin voru til upphafsathugana á fuglalífi í fjarðarbotnum eru Norðfjörður, Eskifjörður, Reyðarfjörður og Seyðisfjörður.

Þessi svæði eru nokkuð vel þekkt fyrir hvað fuglalíf varðar og liggja heimildir heimamanna og annara víða og hafa ýmsar athuganir verið settar fram í skýrslur. En upplýsingaöflun sú sem fram fór að þessu sinni lýtur að tegundum og fjölda einstaklinga sem nýta fjarðarbotnanna og leirurnar á þessum stöðum yfir sumarið.

Ljóst var í upphafi verks að það fór heldur seint af stað á árinu þannig að vorið skilaði ekki nema vissum tegundum inn sem fara um svæðin á leið sinni til fjarlægari heimkynna. En engu að síður fengust upplýsingar um fugla svæðanna og nýtingu þeirra á þeim á ýmsum tímum.

Vert er að íhuga áframhaldandi skoðun og vakta þessa staði og einnig að taka inn fleiri staði. Ekki verður vitnað í athuganir annara af þessum svæðum til samanburðar.

Hér verða athuganirnar kynntar og þær skírðar að einhverju leiti, mest í töflu formi þar sem þær eru mest byggðar á talningum.