Kalstofan á Möðruvöllum : kynning á aðstöðu og rannsóknum

Abstract

Hjá Rannsóknastofnun landbúnaðarins á Möðruvöllum hafa verið stundaðar rannsóknir á kali í túnum frá árinu 1972. Fyrsti búnaður til kalrannsókna var keyptur árið 1984 og síðar fluttur inn í nýinnréttaða kalrannsóknarstofu árið 1987. Rannsóknir hafa einkum beinst að frostþoli og svellþoli ýmissa tegunda túngrasa, hvítsmára og vetrarkorns. Auk þess voru gerðar rannsóknir á öndun og loftskiptum grasa undir svelli. Búnaðurinn hefur verið notaður við rannsóknir á skordýrum, meðal annars rannsóknir á frostþoli sitkalúsarstofna. Í seinni tíð hefur búnaðurinn í auknu mæli verið nýttur af Rannsóknastöð Skógræktar ríkisins til frostþolsprófana á ýmsum trjátegundum, kvæmum þeirra, fjölskyldum og klónum. Prófað hefur verið frostþol trjáplantna í samspili við skyggingu í gróðrastöð og mismunandi áburðargjöf.

Haustið 2000 var fjárfest í nýjum búnaði sem gefur kost á umfangsmeiri og nákvæmari prófunum á frostþoli plantna, plöntuhluta og frumuræktun í tilraunaglösum. Aðstaðan býður uppá ræktun plantna við stýrða lýsingu og hitastig. Rekstur Kalstofunnar er samstarfsverkefni Rannsóknastofnunar landbúnaðarins og Rannsóknastöðvar Skógræktar ríkisins.