Útdráttur:
|
Gerð er grein fyrir helstu niðurstöðum könnunar um upplýsingasöfnun og vistun jarðhitagagna sem lögð var fyrir sérleyfisveitur, orkufyrirtæki og ráðgjafastofur ásamt eftirlits- og háskólastofnunum í janúar 2011. Tilgangur með könnuninni var að fá upplýsingar um það hvaða jarðhitagögnum er safnað, á hvaða formi þau eru, hvernig varðveislu gagna er háttað og hvað betur mætti fara. Könnuninni var skipt upp í þrjá meginhluta: vinnslueftirlit á jarðhitasvæðum, virkjun jarðhitasvæða og yfirborðsrannsóknir á jarðhitasvæðum. Helstu niðurstöður voru þær að mikilvægustu gögnin í tengslum við jarðhitarannsóknir að mati þátttakenda voru eftirfarandi: vatnsmagn/rennsli, hitastig, vatnsborð, efnamælingar, vermi, þrýstingur og borholuupplýsingar. Í heildina er meirihluti jarðhitagagna varðveittur í gagnagrunni en þó er stór hluti gagna varðveittur á ýmsu öðru formi. Í lok hvers hluta könnunarinnar var spurt að því hvað betur mætti fara við varðveislu og aðgang að gögnunum. Mjög skýr skilaboð voru frá þátttakendum um að bæta mætti aðgengi að gögnum þar sem þau væru uppfærð á einum stað. |