Kvikmyndaskóli Íslands : Stofnanaúttekt

Abstract

1. Almennar niðurstöður  Kvikmyndaskóli Íslands er sérskóli á framhaldsskólastigi sem býður upp á hagnýtt nám í kvikmyndagerð en segja má að skólinn sé lista- og verknámsskóli í kvikmyndagerð.  Kvikmyndaskóli Íslands er ungur skóli í þeirri mynd sem hann er nú. Uppbygging skólans hefur verið hröð í kjölfar þess styrktarsamnings um þróunarverkefni milli skólans og menntamálaráðuneytisins sem gerður var árið 2007. Margt í uppbyggingarstarfi skólans hefur gengið eftir en jafnframt er ljóst að taka verður skipulag skólans og ferli fastari tökum. Mikill metnaður og eldmóður virðist einkenna stjórnendur og nemendur eru almennt jákvæðir í garð skólans.  Það háir starfsemi Kvikmyndaskólans að ekki liggur fyrir formleg og afgreidd stefnumörkun um það hvers konar skóli Kvikmyndaskólinn eigi að vera en skólinn hefur haft viðurkenningu sem einkaskóli á framhaldsskólastigi. Stjórnendur skólans tala hins hins vegar um að skólinn stefni á að verða skóli á háskólastigi. Þá virðast reglur skólans skrifaðar út frá því að um sé að ræða skóla á háskólastigi en ekki sérskóla á framhaldsskólastigi. Óljós sýn á eðli skólans endurspeglast einnig í því hvernig skólinn velur inn nemendur. Námslýsingum er oft ábótavant og viðmið varðandi námsmat óljós. Ekki liggur fyrir skýr stefna um það hvaða formlegu kröfur eru gerðar til kennara.  Ekki er boðið upp á sambærilegt, heildstætt nám og Kvikmyndaskóli Íslands býður upp á í öðrum íslenskum skóla. Borgarholtsskóli býður upp á fagnám fyrir störf hjá fjölmiðlum og við upplýsingamiðlun í stofnunum og fyrirtækjum sem skarast að einhverju leyti við námskeið Kvikmyndaskólans en nemendur Borgarholtsskóla brautskrást af listnámsbraut sem er ekki sambærilegt. Aðrir skólar bjóða upp á einstaka námskeið sambærileg þeim í Kvikmyndaskólanum.  Mat úttektaraðila er að skólinn bjóði upp á hagnýtt nám í kvikmyndagerð. Uppbygging námsins kallar á samstarf milli nemenda í framleiðslu, leikstjórn og handritagerð auk samstarfs við nemendur sem læra leiklist, sem býður upp á verulegan ávinning fyrir nemendur. 2. Skipulag og stjórnun  Kvikmyndaskólinn er fjölskyldufyrirtæki og náin tengsl eru á milli eignarhalds og stjórnunar. Starfsemi skólans hefur vaxið mikið á síðustu árum og ekki síst í því ljósi er æskilegt að gera reksturinn sjálfstæðari frá eigendum. Þetta mætti gera þannig að eigendur myndu annaðhvort einbeita sér að daglegum rekstri eða þá stefnumótun í gegnum stjórnarsetu en ekki hvoru tveggja eins og raunin er í dag.  Í þessu sambandi má nefna að óheppilegt er að stjórnarformaður skólans starfi jafnframt sem skólameistari, þótt hann gegni ekki því starfsheiti, og stýri daglegum rekstri skólans. 3. Innviðir, ferli og kennsla  Þróunarsamningur mennta- og menningarmálaráðuneytisins sem framlengdur var til loka ársins 2010 hefur að mestu leyti gengið eftir. Skipulag og ferli skólans hafa skýrst sl. 3 ár en engu að síður þarf að styrkja frekar ferli, áherslur og kröfur er snúa að ráðningum deildarforseta og kennara skólans , inntöku nemenda, kennsluháttum, námsmati, réttindum og skyldum nemenda, sjálfsmati skólans og gæðamálum.  Kennsla sem fer fram er að miklu leyti verkleg en einnig í fyrirlestrarformi en lögð er áhersla á að gera nemendur sjálfstæða og skerpa sköpunargáfu þeirra og þekkingu. Kennslumagn og viðvera í skólanum Kvikmyndaskóli Íslands - stofnanaúttekt 3 er nokkuð mikil í samanburði við framhaldsskólastigið og nemendur öðlast víðtæka þekkingu í kvikmyndafræðunum.  Formlegt kennslumat frá nemendum er það sem einna helst er stuðst við þegar kennsla er metin og er ágæt reynsla af því.  Námsmat er ekki nógu vel skilgreint og staðlað og ræðst í flestum tilvikum of mikið af persónubundnu mati kennara. Samræma þarf og skýra með nákvæmum hætti hvað lagt er til grundvallar námsmati einstakra námskeiða. Einnig þarf að skýra frekar vægi ástundunar sem hluta af einkunn þar sem við á og hvaða viðmið séu til grundvallar þegar ástundun og þátttaka er hluti af námsmati. Vel er staðið að mati á útskriftarverkefnum nemenda við skólann.  Lagt er til að undirbúningur og innsetning kennara verði með skipulagðari og formlegri hætti en nú er. Kennurum verði sömuleiðis leiðbeint frekar varðandi námsmat og hvernig eigi að vinna með mætingar og agavandamál nemenda.  Við frekari þróun náms ber að velta upp þeim möguleika að nám í einstaka deildum verði lengt um ár til að gefa nemendum kost á aukinni sérhæfingu. Samstarf deildarforseta hefur aukist og batnað mikið, sérstaklega eftir að vikulegum fundum deilarforseta, kennslustjóra og stjórnarformanns var komið á sl. haust. Bæta má þó enn frekar samvinnu milli sviða.  Deildarforsetar Kvikmyndaskólans eru almennt séð mjög jákvæðir gagnvart skólanum og reiðubúnir að leggja mikið á sig í þágu skólans. Þeir sinna hins vegar störfum sínum sem verktakar og er starfshlutfall þeirra 50%. Eðlilegt má telja að deildarforsetar sem ábyrgð bera á sérsviðum séu fastráðnir og starfshlutfall aukið til að tryggja samfellu í starfi skólans og tryggja fagmennsku og gæði í starfi.  Gæðamál skólans eru ekki skilgreind og þyrfti að greina og skilgreina verkferla skólans og koma á og skilgreina starfsemi fagráða.  Kvikmyndaskóli Íslands heldur vel utan um hvern nemanda sem stundar nám hjá skólanum og eru nemendur almennt frekar ánægðir með námið. Af þeim sem úttektaraðili hitti hafa margir hug á að mennta sig frekar í kvikmyndafræðum. Fyrrverandi nemendur starfa flestir í faginu þegar vinnu er að hafa.  Húsnæði skólans er rúmt en á enn langt í land með að vera fullklárað og getur það hægt á framþróun skólans. 4. Rekstur  Fjárhagsleg staða skólans er veik og hana þarf að styrkja verulega eigi skólinn að geta staðið undir langtíma skuldbindingum sínum.