Gróður, fuglar og smádýr á 18 háhitasvæðum : samantekt fyrirliggjandi gagna

Abstract

Upplýsingum um tegundir plantna, smádýra, fugla og gróðurfar var safnað saman fyrir 18 háhitasvæði. Fyrirliggjandi gögn um gróður og dýralíf á háhitasvæðunum eru fyrst og fremst byggð á skráningum um náttúrufar úr gagnagrunnum Náttúrufræðistofnunar Íslands og útgefnum ritum sem fjalla um náttúrufar svæðanna.

Verkefnið er liður í öflun gagna um náttúrufar vegna 2. áfanga rammaáætlunar um nýtingu vatnsafls og jarðvarma. Meginmarkmið verkefnisins var að afla nauðsynlegra gagna til að flokka háhitasvæði eftir náttúrufari og meta verndargildi þeirra. Nánari umfjöllun um lífríki og jarðminjar svæðanna og niðurstöður mats á verndargildi eru í öðrum skýrslum sem gefnar hafa verið út í tengslum við verkefnið. Háhitasvæðin eru misjafnlega stór og spanna þau allt frá fáeinum til hundruða ferkílómetra. Innan stærstu svæðanna eru tilgreind í heild 21 undirsvæði. Í skýrslunni koma fram upplýsingar um fjölda plantna, smádýra og fugla á hverju svæði og undirsvæðum þeirra eftir því sem gögn lágu fyrir.

Sérstaklega er getið um jarðhitategundir, tegundir á válista og þær sem hafa hátt verndargildi. Gerð er grein fyrir gróðurfari svæðanna og helstu gróðursamfélögum, landgerðum og undirflokkum þeirra lýst.

Upplýsingar sem liggja fyrir um einstaka náttúrufarsþætti eru misjafnar bæði á milli svæða og innan svæða. Einnig er misjafnt hvenær gögnum var safnað. Þekking á náttúrufarsþáttum er því afar misjöfn milli svæða eftir fyrirliggjandi gæðum gagna. Ekkert svæðanna hefur verið skoðað í heild sinni en í flestum tilfellum eru til upplýsingar af afmörkuðum stöðum sem gefa þó í mörgum tilfellum raunhæfa mynd af þeim tegundum sem finnast á svæðunum. Leitast var við að meta gæði fyrirliggjandi gagna og var þekking á náttúrufari einstakra svæða flokkuð sem góð, nokkur, lítil eða engin. Fjölbreytileiki einstakra náttúrufarsþátta og fjöldi sjaldgæfra tegunda á háhitasvæðum var ennfremur metinn en einnig var horft til mats á gæðum fyrirliggjandi gagna á hverju svæði.