Ímynd Íslands : styrkur, staða og stefna

Abstract

Ísland er land í mótun. Í þjóðinni býr náttúrulegur kraftur sem mótast hefur í sambúð við harðbýla en gjöfula náttúru. Íslendingar búa yfir eiginleikum sem gegnt hafa veigamiklu hlutverki í lífsbaráttu þjóðarinnar og eru nú grunnurinn að kröftugu viðskiptalífi, blómlegu menningarstarfi og framsæknu samfélagi. Kraftur og aðlögunarhæfni þjóðarinnar hefur skilað Íslandi í hóp samkeppnishæfustu landa heims.

Mikilvægt er að tryggja að Ísland verði áfram „best í heimi“ – land sem býður þjóð sinni mestu lífsgæði sem völ er á. Forsenda þess er að skapa skilyrði fyrir fjölbreytt, framsækið þekkingarsamfélag sem skarar fram úr á sviði sjálfbærrar nýtingar hreinnar náttúru, kraftmikils atvinnulífs, frumlegrar menningar og skapandi mannauðs.

Sterk, jákvæð ímynd er náttúruleg nauðsyn hverri þjóð. Hún byggir á eiginleikum fólks, menningarlífi, samfélagsgerð, atvinnulífi og stjórnskipulagi, athöfnum og orðum og þeim afurðum sem þjóðin skapar. Jákvæð ímynd styrkir sjálfsmynd þjóðarinnar, hvetur hana til dáða og stemmir stigu við þekkingartapi sem mörg smærri samfélög hafa upplifað á sl. áratugum með brottflutningi sérhæfðra starfsstétta og aldurshópa. Ímynd má líkja við viðskiptavild, sem laðar að fólk, fjármagn og hugmyndir og er efnahagslífi þjóðar nauðsynleg. Ávinningur af markvissri uppbyggingu ímyndar Íslands bæði innanlands og utan er því augljós.

Forsætisráðuneytið skipaði í nóvember árið 2007 nefnd til að gera tillögur um hvernig megi styrkja ímynd Íslands. Helsta hlutverk nefndarinnar var að gera úttekt á skipan ímyndarmála hér á landi, móta drög að stefnu Íslands í þessum málaflokki og leggja fram tillögur að skipulagi ímyndarmála og aðgerðum til að styrkja ímynd Íslands.