Gróður og fuglalíf á rannsóknasvæði fyrirhugaðrar vega- og brúargerðar við Hornafjarðarfljót

Abstract

Að ósk Vegagerðarinnar fóru fram rannsóknir á gróðurfari og fuglalífi á vegum Náttúrufræðistofnunar Íslands vegna fyrirhugaðrar veglagningar við Hornafjarðarfljót. Rannsakað var umhverfi þriggja veglína, leiðar 1, 2 og 3 auk mögulegra efnistökustaða. Einungis var rannsakað umhverfi veglína þar sem þær liggja í nýju umhverfi, ekki í núverandi vegstæði. Til hagræðis og vegna hugsanlegs möguleika á að víxla veglínum við Hornafjarðarfljót var rannsóknasvæðinu skipt í þrennt, Mýrar, Skógey og Nes, og er fjallað um hvert svæði fyrir sig. Gróður var kortlagður á svæði sem nær minnst 200 m út frá hverri veglínu til beggja handa, en töluvert stærra svæði var kortlagt í heildina til samanburðar. Gróðurkort í mælikvarða 1:15.000 fylgir skýrslunni í vasa. Gróðurlendakort af hverju svæði eru inni í skýrslunni auk korts sem sýnir útbreiðslu votlendis. Gerð er grein fyrir sérstæðum gróðurfélögum á svæðinu í umfjöllun. Einnig var gerð úttekt á tegundafjölbreytni háplantna.

Fuglar voru taldir á sniðum á og við fyrirhuguð vegstæði, þéttleiki þeirra metinn og út frá atferli lagt mat á hvort þeir væru varpfuglar á svæðinu. Gerð er grein fyrir mikilvægi strandsvæða á rannsóknasvæðinu fyrir fuglalíf og ekki síst fyrir þann gríðarlega fjölda farfugla sem hafa viðkomu á svæðinu á fartíma, vor og haust.

Hluti þess svæðis sem kortlagt var (Skarðsfjörður) er á Náttúruminjaskrá vegna lífauðugra leira og mikils fuglalífs á grunnsævi.