Gróðurkort af fjórum svæðum á Hellisheiði og nágrenni

Abstract

Verkfræðistofa Guðmundar og Kristjáns fyrir hönd Orkuveitu Reykjavíkur óskaði eftir að Náttúrufræðistofnun Íslands aflaði viðbótarupplýsinga við fyrri rannsóknir á gróðurfari á virkjanasvæðum á Hellisheiði og nágrenni vegna áforma um nýtingu jarðhita. Gert var ráð fyrir gróðurkortlagningu nýrra svæða ásamt afmörkun á svæðum þar sem sérstæðan gróður er að finna á Ölkelduhálssvæði og við Hverahlíð. Áhersla var lögð á jarðhitagróður með tilliti til verndargildis hans, en Orkuveita Reykjavíkur vill að til séu gróðurfarsleg gögn yfir svæði sem hugsanlega verða skoðuð vegna hugmynda um frekari orkuöflun á heiðinni. Til samanburðar voru rannsökuð svæði utan fyrirhugaðra framkvæmdasvæða sem getið er um í matsáætlunum. Í því skyni var gróðurfar í Reykjadal og Grændal kortlagt. Einnig voru skoðuð sérstaklega fyrirhuguð borsvæði með tilliti til þess hvort æskilegt væri að kortleggja þau í stærri mælikvarða vegna verndargildis gróðurs. Hluti þess svæðis sem kortlagður var er á Náttúruminjaskrá t.d. í Reykjadal, Grændal, Fremstadal og Miðdal.