Útbreiðsla naðurtungu við fjögur borstæði á Reykjanesi

Abstract

Fyrir hönd Hitaveitu Suðurnesja hf. óskaði VSÓ Ráðgjöf, í bréfi dagsettu 10. október 2005, eftir að Náttúrufræðistofnun Íslands kannaði nánar gróður við fyrirhugaðar borholur vegna jarðhitanýtingar á Reykjanesi. Komið hefur fram í eldri rannsóknum og áðursendum gögnum Náttúrufræðistofnunar til VSÓ Ráðgjafar að tegundin naðurtunga (Ophioglossum azoricum) finnst í nágrenni framkvæmdasvæðisins en hún er á válista stofnunarinnar yfir tegundir í nokkurri hættu. Vegna mats á umhverfisáhrifum framkvæmdanna var farið fram á að borstæðin yrðu rannsökuð sérstaklega til að staðfesta hvort naðurtunga kæmi fyrir á þeim svæðum. Borholurnar eru allar innan svæðis sem er á náttúruminjaskrá.

Athugunarsvæði miðaðist við 50 m geisla út frá meintri staðsetningu borholanna. Naðurtunga fannst ekki innan rannsóknasvæðanna og voru dregnar þær ályktanir að hana sé ekki að finna á svæðunum fjórum. Samkvæmt hitamælingum gætu þó ákjósanleg skilyrði fyrir vöxt og viðgang naðurtungu verið fyrir hendi innan svæðisins við borholu 21 og í nágrenni svæðis 22. Þótt langt sé liðið á haustið ættu niðurstöðurnar að gefa nokkra hugmynd um útbreiðslu naðurtungu innan framkvæmdasvæðanna.