Norðausturvegur um Melrakkasléttu : náttúrufarskönnun vegna vegagerðar

Abstract

Greint er frá niðurstöðum könnunar á gróðri meðfram fyrirhuguðum veglínum í nágrenni Katastaða og svo áfram eftir Hófaskarðsleið meðfram Álftatjörn. Gerð er grein fyrir einstökum valkostum.

Einnig er fjallað um niðurstöður könnunar á fuglalífi á Hólaheiði á Hófaskarðsleið og dregnar ályktanir um áhrifasvæði fyrirhugaðrar vegagerðar. Áhrifa fyrirhugaðs vegar á samfélag mófugla mun gæta einhver hundruð metra út frá veginum. Hugsanleg neikvæð áhrif eru aukin afföll sem leiða til lægri þéttleika á þessu svæði. Miðað við 500 m breitt belti er stofnstærð mófugla sem verða fyrir áhrifum um 2000 pör. Allar eru þessar mófuglategundir algengar á héraðs- og landsvísu. Þrjár tegundir á válista verða einnig fyrir neikvæðum áhrifum ef af vegagerð verður. Þetta eru himbrimi (2-3 pör), fálki (4 óðul), svartbakur (3-5 pör) og hrafn (3 óðul).

Gróðurkort er sýnt af Raufarhafnarleið. Niðurstöður þeirrar kortlagningar sýna að engin sjaldgæf gróðurfélög er að finna á fyrirhuguðum vegstæðum á Raufarhafnarleið. Gróðurinn er dæmigerður fyrir svæðið og með svipuðum gróðursamfélögum og finna má víða annars staðar á þessum slóðum. Tekist hefur sérstaklega vel á tveimur veglínum að sneiða hjá votlendi og gerir Náttúrufræðistofnun Íslands engar athugasemdir við þær veglínur með tilliti til einstakra gróðursamfélaga. Um þriðjungur þriðju veglínunnar liggur aftur á móti um óspillt votlendi. Þrátt fyrir að mikil votlendisflæmi séu skammt undan mælir Náttúrufræðistofnun Íslands síður með þeirri leið vegna verndargildis votlendis almennt.