| dc.description |
Hér verður fjallað um sjö þéttbýlisstaði í fimm sveitarfélögum á Reykjanesi. Sveitarfélögin eru sveitarfélagið Garður, Grindavíkurbær, Reykjanesbær, Sandgerðisbær og Vatnsleysustrandarhreppur. Þéttbýlisstaðirnir eru Garður, Grindavík, Keflavík, Njarðvík, Hafnir, Sandgerði og Vogar. Byggt er á viðtölum við bæjar- og sveitarstjóra þessara sveitarfélaga og niðurstöðum úr spurningakönnun sem þeir svöruðu. Viðmælendur voru eftirtaldir: Sigurður Jónsson sveitarstjóri sveitarfélagsins Garðs, Ólafur Örn Ólafsson bæjarstjóri Grindavíkurbæjar, Árni Sigfússon bæjarstjóri Reykjanesbæjar, Sigurður Valur Ásbjarnarson bæjarstjóri Sandgerðisbæjar og Jóhanna Reynisdóttir sveitarstjóri Vatnsleysustrandarhrepps. Íbúum á Reykjanesi hefur fjölgað stöðugt frá árinu 1991, þeir voru 15.355 árið 1991 en 16.932 árið 2003, eða 10,3% fleiri. Á sama tíma hefur íbúum á Íslandi fjölgað úr 259.581 í 290.490 eða um 11,9%. Aldursdreifing íbúa Reykjaness árið 2003 sýnir að íbúafjöldi í yngri aldurshópunum, þ.e. íbúar í aldurshópunum 0-4 ára til 25-29 ára er yfir landsmeðaltali. Aldurs-dreifing á Reykjanesi er í nokkuð góðu jafnvægi.
Á Reykjanesi fjölgaði störfum um 5,1% á tímabilinu frá 1998 til 2003 þegar þeim fjölgaði á landsvísu á sama tíma um 7%. Störfum í frumvinnslu-greinum á Reykjanesi hefur fækkað um 27,6% frá árinu 1998 til ársloka 2003, miðað við 13,2% fækkun á landsvísu á sama tímabili. Störfum í þjónustugreinum á Reykjanesi hefur fjölgað hlutfallslega svipað og landsmeðaltal. Störfum í fræðslustarfsemi á Reykjanesi hefur fjölgað umtalsvert umfram landsmeðaltal á þessu tímabili. Birtar eru tölulegar upplýsingar um efnahags- og rekstrarstöðu sveitarfélaga miðað við fjölda íbúa, meðal tekju- og fjárhagsstöðu íbúa ásamt stöðu atvinnulífs, fjölda starfa, fiskvinnslu og afla á Reykjanesi. Þessar upplýsingar taka til landshlutans í heild en ekki til einstakra sveitarfélaga. Í SVÓT-greiningunni er hins vegar fjallað um einstaka þéttbýlisstaði og sveitarfélög. Niður-staða úr könnun sem gerð var á netinu á eingöngu við um það bæjar- eða sveitarfélag sem viðkomandi bæjar- eða sveitarstjóri starfar fyrir. Því eru tölulegu upplýsingarnar og greiningin ekki byggðar á sama grunni. Hafa ber einnig í huga að erfitt er að alhæfa um landshlutann í heild vegna mismunandi aðstæðna sveitarfélaga. Í öllum landshlutum eru sveitarfélög þar sem atvinnu- og samfélagsþættir standa ágætlega, eins og fram kemur í könnun sem gerð var á netinu samfara þessari greiningu. Reykjanesbær kemur best út af bæjar- og sveitarfélögum á Reykjanesi, einnig þótt tekið sé mið af upplýsingum úr öllum landshlutum varðandi atvinnu- og samfélagsþætti. Margir starfsmenn Byggðastofnunar hafa komið að yfirlestri þessarar skýrslu sem ber að þakka, einnig hefur Guðbjörg Jóhannsdóttir atvinnuráðgjafi Sambands sveitarfélaga á Suðurnesjum veitt góðar ábendingar. |
is |
