Samræming fjölskyldu- og atvinnulífs : Greinargerð vinnuhóps um samræmingu fjölskyldu- og atvinnulífs

Abstract

Tillögur vinnuhóps um samræmingu fjölskyldu- og atvinnulífs Ríki og sveitarfélög sem atvinnurekendur og veitendur þjónustu: Tillaga 1: Send verði áskorun á sveitarfélög og ríkisstofnanir þar sem þeim er bent á ábyrgð sína sem atvinnurekendur og veitendur þjónustu að stuðla að samræmingu fjölskyldu- og atvinnulífs. Markmiðið er að ríki og sveitarfélög taki mið af þörfum starfsfólks og íbúa með tilliti til samræmingar fjölskyldu- og atvinnulífs. Tillaga 2: Tryggja að ríki, sveitarfélög, stofnanir og fyrirtæki í þeirra eigu fari að lögum og setji sér aðgerðabundnar jafnréttisáætlanir þar sem markvisst verði unnið að samræmingu fjölskyldu- og atvinnulífs. Markmiðið er að ríki og sveitarfélög verði fyrirmyndarvinnuveitendur með virka jafnréttisáætlun sem auðveldar starfsfólki að samræma fjölskyldu- og atvinnulíf. Atvinnulífið – fyrirtæki og stofnanir: Tillaga 3: Tryggja að fyrirtæki og stofnanir fari að lögum og setji sér aðgerðabundnar jafnréttisáætlanir þar sem unnið er að samræmingu fjölskyldu- og atvinnulífs. Vakin verði athygli á jafnréttissáttmála UN Women. Tillaga 4: Skipuð verði sérstök nefnd sem fjallar um styttingu vinnuvikunnar. Fræðsla, kynning og vitundarvakning í samfélaginu: Tillaga 5: Velferðarráðuneytið standi fyrir fjölskylduviku með sérstakri áherslu á samræmingu fjölskyldu- og atvinnulífs. Markmiðið er vitundarvakning í samfélaginu um hvernig stuðla má að fjölskylduvænni vinnumenningu og samfélagi. Tillaga 6: Hvetja aðila vinnumarkaðarins til að standa fyrir fræðsluátaki með áherslu á endurmenntun stjórnenda út frá gildum fjölskyldunnar. Nýta mætti fræðsluefni Hins gullna jafnvægis: Sveigjanleiki á vinnustað í tíu skrefum. Tillaga 7: Að sveitarstjórnarfólki, alþingismönnum, launafólki og atvinnurekendum verði boðið að sækja námskeið með áherslu á samræmingu fjölskyldu- og atvinnulífs. Kynning og aðgangur að upplýsingum og fræðslu: Tillaga 8: Heimasíðan hiðgullnajafnvægi.is og verkefnið verði kynnt fyrir öllum ríkisstofnunum, sveitarfélögum, fyrirtækjum, stofnunum, launafólki og stéttarfélögum. Áframhaldandi birting heimasíðunnar verði tryggð. Tillaga 9: Tveir fræðslubæklingar, annar fyrir launafólk og hinn fyrir stjórnendur, verði gefnir út og þeim komið í dreifingu ásamt fræðsluefni um samræmingu fjölskyldu- og atvinnulífs. Tillaga 10: Kynna mikilvægi samræmingar fjölskyldu- og atvinnulífs, verkefnið og heimasíðuna á jafnréttisþingi og landsfundi jafnréttisnefnda haustið 2013. Frekari greining og framhald: Tillaga 11: Vinna nánari greiningu á því hvað brennur helst á launafólki og atvinnurekendum hvað varðar samræmingu fjölskyldu- og atvinnulífs. Tillaga 12: Jafnréttisstofu verði falið það verkefni að halda utan um heimasíðuna hiðgullnajafnvægi.is og fylgja verkefninu og hugmyndafræði Hins gullna jafnvægis eftir.