Skýrsla um eftirfygni: Kostnaður, skilvirkni og gæði háskólakennslu (2007)

Abstract

Í stjórnsýsluúttektinni Kostnaður, skilvirkni og gæði háskólakennslu (2007) bar Ríkisendurskoðun saman nokkra þætti sem lúta að kennslu fjögurra íslenskra háskóla í viðskiptafræði, lögfræði og tölvunarfræði á árunum 2003–05. Jafnframt benti stofnunin á ýmislegt sem betur mætti fara. Ríkisendurskoðun fagnar ýmsum jákvæðum breytingum í starfi íslenskra háskóla frá 2007, m.a. viðleitni þeirra til að draga úr brottfalli nemenda, auknu gæðaeftirliti mennta‐ og menningarmálaráðuneytis með háskólakerfinu og samþykktri stefnu stjórnvalda um opinbera háskóla. Um leið ítrekar stofnunin þær ábendingar til ráðuneytisins sem enn hafa ekki eða einungis að nokkru leyti leitt til æskilegra breytinga. Í tengslum við eftirfylgniúttekt sína tók Ríkisendurskoðun saman upplýsingar um nokkra þætti í starfsemi háskólanna á tímabilinu 2001–10 til að sýna þróun mála eftir að skýrslan kom út. Einkum var hugað að fjölda nemenda á háskólastigi, fjöldastjórnun stjórnvalda, fjármögnun háskóla, ytra gæðaeftirliti með þeim og brottfalli nemenda. Sú vinna leiddi til nýrrar ábendingar til mennta‐ og menningarmálaráðuneytis.