|
Útdráttur:
|
Af áburðarefnunum, N, P og K, hefur nitur (N) beinust áhrif á magn uppskeru, en öll hafa þau áhrif á gæðin. Árið 1975 kom út samantekt um tilraunir með N til ársins 1974, alls 36 tilraunir þar sem uppskera hafði verið mæld í a.m.k. tvö ár (Hólmgeir Björnsson 1975b). Í annarri grein var fjallað um helstu náttúrulegar uppsprettur niturs. Frá ísaldarlokum, í um tíu þúsund ár, hefur nitur safnast í jarðveg, einkum mýrar. Jarðvegur eins og á Íslandi, sem er ríkur af eldfjallaösku, andosol, hefur sérstaka eiginleika til að safna nitri og er hann því frjósamur. Þessi frjósemi hefur staðið undir búfjárhaldi Íslendinga, bæði beit og vetrarfóðri, alla íslandsbyggð. Rétt er að halda því á lofti að þegar nitur safnast í jarðveg safnast þar einnig kolefni, og að sama skapi, þegar nitur losnar úr jarðvegi tapast kolefni. Þessir ferlar eiga því þátt í gróðurhúsaáhrifum. |
