Geislaálag starfsfólks sem vinnur við jónandi geislun á Íslandi : Yfirlit fyrir árið 2011

Abstract

Kynnt er árleg samantekt Geislavarna ríkisins (GR) á niðurstöðum um geislaálag starfsfólks sem vann við jónandi geislun á árinu 2011. Samtals báru 454 einstaklingar geislamælifilmur frá GR á síðasta ári og starfa þeir hjá 76 fyrirtækjum og stofnunum. Um 76% þeirra vinna við störf tengd heilbrigðisþjónustunni og rúmlega 60% starfa við læknisfræðilega myndgreiningu. Af þessum 454 einstaklingum mældist geislun hjá 92 eða um 20%. Meðalgeislaálag var 0,12 mSv ef miðað er við alla sem báru geislamælifilmu, en ef eingöngu er miðað við þá starfsmenn sem geislun mældist hjá er meðalgeislaálagið 0,57 mSv. Þá voru 33 einstaklingur var með geislaálag á bilinu 0,5 – 1 mSv og 14 einstaklingar voru á bilinu 1 – 3 mSv. Enginn starfsmaður var með hærra geislaálag en 3 mSv. Þannig voru um 97% allra starfsmanna ekki með mælanlegt geislaálag eða með geislaálag undir 1 mSv, sem er 1/20 af hámarks leyfilegu árlegu geislaálagi samkvæmt reglugerð nr. 627/2003 um hámörk geislunar starfsmanna og almennings vegna starfsemi þar sem notuð er jónandi geislun. Hópgeislaálag var 0,073 mannSv, sem er örlítið lægra en á síðasta ári (0,084 mannSv) og lægra en meðaltal síðustu 10 ára (0,111 mannSv). Þá eru einnig birtar niðurstöður á mati á geislaálagi flugáhafna á Íslandi. Niðurstöðurnar eru sem fyrr eingöngu fyrir einn flugrekanda og eru fyrir árin 2008 til 2011. Fjöldi starfsmanna með mælanlega geislun á árinu 2011 er 885. Meðalgeislaálag þeirra var 2,26 mSv og hópgeislaálag var 2,0 mannSv. Einn starfsmaður var með geislaálag yfir 5 mSv (5,1 mSv) og enginn var hærri. Flugliðar eru langfjölmennasti hópur geislastarfsmanna og með mun hærra meðalgeislaálag en aðrir hópar geislastarfsmanna á Íslandi.