Geislaálag starfsfólks sem vinnur við jónandi geislun á Íslandi : Yfirlit fyrir árið 2009

Abstract

Kynnt er árleg samantekt Geislavarna ríkisins (GR) á niðurstöðum um geislaálag starfsfólks sem vann við jónandi geislun á árinu 2009. Samtals báru 482 einstaklingar geislamælifilmur frá GR á síðasta ári og starfa þeir hjá 75 fyrirtækjum og stofnunum. Um 85% þeirra vinna við störf tengd heilbrigðisþjónustunni og 71% starfa við læknisfræðilega myndgreiningu. Af þessum 479 einstaklingum mældist geislun hjá 121 eða 25,3 %. Meðalgeislaálag var 0,21 mSv ef miðað er við alla sem báru geislamælifilmu, en ef eingöngu er miðað við þá starfsmenn sem geislun mældist hjá er meðalgeislaálagið 0,81 mSv. Eingöngu 21 einstaklingur var með geislaálag á bilinu 0,5 – 1 mSv og 23 einstaklingar voru á bilinu 1 – 5 mSv. Þá voru tveir einstaklingar með hærra en 5 mSv og reyndar báðir með hærra en 10 mSv. Annar starfsmaður á myndgreiningardeild (11.3 mSv) og hinn starfsmaður á hjartaþræðingardeild (10,7 mSv). Þannig voru 95% allra starfsmanna ekki með mælanlegt geislaálag eða geislaálag undir 1 mSv, sem er 1/20 af hámarks leyfilegu árlegu geislaálagi samkvæmt reglugerð nr. 627/2003 um hámörk geislunar starfsmanna og almennings vegna starfsemi þar sem notuð er jónandi geislun. Hópgeislaálag var 0,118 mannSv, sem er örlítið hærra en á síðasta ári (0,106 mannSv) og svipað og meðaltal síðustu 10 ára (0,115 mannSv). Í fyrsta skiptið eru einnig kynntar niðurstöður á mati á geislaálagi flugáhafna á Íslandi. Niðurstöðurnar eru fyrir einn flugrekanda og eru fyrir árin 2008 og 2009. Fjöldi starfsmanna með mælanlega geislun eru 2331 fyrir 2008 og 1901 fyrir árið 2009. Meðalgeislaálag þeirra var 2,15 mSv og 2,13 mSv og hópgeislaálag var 5.01 og 4.05 mannSv fyrir þessi tvö ár. Enginn starfsmaður var með geislaálag yfir 5 mSv.