Brennisteinsfjöll : rannsóknir á jarðfræði svæðisins

Abstract

Jarðhitasvæðið í Brennisteinsfjöllum liggur í 400-500 m hæð yfir sjó. Virkur jarðhiti kemur fram sem gufur í um 450 m hæð, en köld ummyndun er á fjórum stöðum og vitnar um meiri virkni á fyrri tíð. Jarðhiti á yfirborði er óverulegur og miðað við útbreiðslu jarðhita og ummyndunar er svæðið um 3 km2. Viðnámsmælingar benda til þess að svæðið sé um 18 km2 á 700 m dýpi undir sjávarmáli, um 1.200 m undir yfirborði þar sem jarðhita verður vart. Háhitasvæðið í Brennisteinsfjöllum liggur á samnefndri sprungurein og hefur gosið þar a.m.k. 30-40 sinnum eftir að ísöld lauk. Brotalínur eru ungar á svæðinu frá sjó og norður á Mosfellsheiði og verða oft jarðskjálftar á um 5 km breiðu og um 40 km löngu belti. Jarðskjálftar í Brennisteinsfjöllum geta orðið nokkuð stórir. Sprungureinin sem fjallað er um í skýrslunni er ein fárra ósnortinna slíkra reina á landinu. Við rannsóknir svæðisins og nýtingu, þarf að taka tillit til merkilegrar jarðfræði þess og fremur líflegrar gossögu. Svæðið nýtur nú aukinnar hylli til útivistar.