Forðafræðistuðlar. Eðliseiginleikar bergsýna : Staða mælinga og úrvinnsla þeirra árið 2000

Abstract

Gerð er grein fyrir stöðu rannsókna á eðliseiginleikum bergsýna í verkþættinum Forðafræðistuðlar í lok árs 2000. Sá þáttur beinist að könnun á innri gerð jarðhitakerfa, einkum forðafræðilegum eiginleikum bergsins með tilliti til ummyndunar og annarra mælanlegra eiginleika. Fyrirliggjandi niðurstöður sýna að lítill munur er á milli virks og heildargrops þannig að nær allt holrými bergsins er opið fyrir gegnumflæði. Hárpípulíkan virðist henta til að lýsa og meta lekt bergsins. Þvermál grophálsa virðist ráðandi um lektina. Kerfisbundinn munur milli mældrar gaslektar og vatnslektar er talinn tengdur mæliaðferðinni og eiginleikun rennslisins á bergsýnið. Ekki er enn fyrir hendi nothæft samband til að áætla lekt gosbergsins út frá öðrum mælingum á bergsýnum. Ljóst er þó að lekt bergsins sýnir fylgni við rafviðnám þess. Þekking á sýnasafninu nálgast ört sambærilega þekkingu fyrir setberg. Unnið er að mælingum á varmaleiðni og rafviðnámi fyrir afmarkaða hópa sýna í samvinnu við erlenda aðila. Einnig er unnið að samanburði á mælingum á kjarnabút úr borholu við síðustu borholumælingar.