Eyfirðingavað : Berggrunnskort 1:25.000

Abstract

Berggrunnskortlagning á vatnasviði Austari-Jökulsár á hálendinu við Eyfirðingavað var unnin á árunum 2000 og 2001 fyrir Landsvirkjun. Tilgangur verksins var að afla upplýsinga um berggrunn á hugsanlegu stæði miðlunarlóns ofan stíflu í grennd við Eyfirðingavað. Eyfirðingavað er gamalt vað á Austari-Jökulsá en um það liggur forn fjallvegur úr Eyjafirði og á Kjalveg. Örnefnið er notað sem heiti á kortblaðinu þar sem það liggur á því miðju, þar hjá er vatnamælingastaður og þar hafa menn haft augastað á stíflustæði. Berggrunnskortið sýnir helstu jarðmyndanir svæðisins, útbreiðslu þeirra og aldur. Þar er um að ræða stafla af basalthraunlögum og setlögum inn á milli þeirra. Móbergslög og móbergsfjöll finnast einnig á svæðinu. Kortið sýnir kaldar og heitar lindir, m.a. jarðhitastaðinn við Laugarfell og helstu hveraaugun þar. Misgengi og sprungur voru einnig kortlögð en svo virðist sem berggrunnurinn sé lítt sprunginn og heillegur.