Selfossveitur : eftirlit með jarðhitavinnslu 2000-2001

Abstract

Gerð er grein fyrir hitamælingum í eftirlitsholum á vinnslusvæði Selfossveitna við Þorleifskot og eftirliti með efnainnihaldi heits vatns í vinnsluholum hitaveitunnar 2000 og 2001. Jarðhitakerfið kólnar stöðugt ofan frá og er kólnunin nú komin niður á 650 m dýpi við holu ÞK-8. Efsti hluti kerfisins kólnar að meðaltali um rúma 1°C á ári. Reglulegar hitamælingar í eftirlitsholum hafa gefið skýra mynd af þessari kólnun. Langtímabreytingar vatnsborðs í kerfinu eru litlar vegna endurnýjunar vatnsforða með aðstreymi kaldara vatns. Vatnsborð í eftirlitsholum hækkaði eftir jarðskjálftana í júní 2000, og hækkun vatnsborðs og aukin kæling við holur ÞK-6, 7 og 8 bendir til að kalt vatn hafi þá sturtast niður í kerfið. Líklegt er að það hafi gerst um sprungu á milli holna ÞK-10 og ÞK-12. Talsverðar breytingar urðu á efnainnihaldi vatns úr holum ÞK-10 og 13 í kjölfar skjálftanna. Líklegt er að hlutur vatns úr dýpri hluta jarðhitakerfisins hafi aukist tímabundið í holu 10 fyrst eftir skjálftana, en síðan hafi hlutur kaldara vatns aukist aftur. Í holu ÞK-13 hefur hlutur vatns úr dýpri hluta kerfisins aukist. Súrefni mælist hvorki í heita vatninu ú holum ÞK-10, 13 og 15 né við inntak eða úttak miðlunargeymis. Mikilvægt er að halda áfram virku vinnslueftirliti.