Jaðar jökla í Vestur-Skaftafellssýslu og Rangárvallasýslu ákvarðaður með fjarkönnun

Abstract

Loftmyndir og gervihnattamyndir af jöklum í Vestur-Skaftafellssýslu og Rangárvallasýslu voru „réttar upp“ í hornsannri keiluvörpun Lamberts í kerfi ÍSN93. Hér er gerð grein fyrir því hvernig útlínur jökla voru ákvarðaðar með því að rekja þær á myndum sem teknar voru á tímabilinu 1999-2003. Líkur eru leiddar að hversu mikið útlínur jöklanna kunna að hafa breyst frá gildistöku þjóðlendulaga 1. júlí 1998 til þess tíma sem þær voru teknar. Hnitsetning jökuljaðars með þessum aðferðum víkur sennilega hvergi meira en 60 m frá því sem var í reynd og víðast miklu minna. Líkur eru á að jöklar minnki ört í náinni framtíð vegna loftslagsbreytinga. Náttúruhamfarir kunna einnig að breyta jöklunum verulega eins og iðulega hefur gerst á sögulegum tíma.