Minningaþríleikur : Bernskubók, Táningabók, Minnisbók

Abstract

Minningaþríleikur Sigurðar Pálssonar er nú fáanlegur í einu riti. Bók þessi inniheldur Bernskubók, Táningabók og Minnisbók hans sem út komu á árunum 2007-2014 og hlutu mikið lof lesenda og gagnrýnenda. Í bókunum vefur Sigurður á sinn einstaka hátt saman minningum sínum og hugleiðingum um lífið og skáldskapinn - teflir saman lifandi fortíðarmyndum og sögum af fólki og hugmyndum sem hafa mótað hann svo úr verður heillandi og auðgandi frásögn. Sigurður hlaut íslensku bókmenntaverðlaunin árið 2007 fyrir Minnisbók.

Hér teflir Sigurður Pálsson fram lifandi fortíðarmyndum sem hafa mótað hann sem einstakling frá frumbernsku, hann lýsir því hvernig skilningarvitin vakna, hvernig barnið nemur og skynjar umhverfi sitt, fjölskyldu og sveitunga, náttúruna, tungumálið. (Um Bernskubók. Heimild: Bókatíðindi)

Þriðja og síðasta bókin í minningaröð Sigurðar Pálssonar. Hér segir frá tónlist, hlátri, Simmasjoppu, ljóðapælingum, MR, Nýja testamentinu á ungversku, Rolling Stones píslarvætti, frönskukennaranum Vigdísi, Rauðu skikkjunni... Persónuleg, fyndin og beitt lýsing á unglingsárum sjöunda áratugarins. (Um Táningabók. Heimild: Bókatíðindi)

Minnisbók segir frá dvöl Sigurðar Pálssonar í Frakklandi á árunum 1967–1982, allt frá því að nítján ára nýstúdent kemur til borgarinnar þar til hann fer heim aftur að námi loknu. Frásagnargleði, einlægni og ljúfsár tilfinning einkenna verkið. Þetta er fyndin og töfrandi lýsing á tíðaranda, aldarspegill mikilla umbrota í vestrænni sögu. Ótalmargar persónur skjóta upp kollinum, þekktar og óþekktar, en allar dregnar skýrum dráttum. (Um Minnisbók. Heimild: Bókatíðindi)