Hvað gengur fólki til? : leit sálgreiningar að skilningi

Abstract

Hvers vegna drekkur sumt fólk of mikið? Hvað veldur því að sumir karlar misþyrma konum sínum og börnum? Hvað fær ungar stúlkur til að svelta sig? Af hverju laðast sumar konur að körlum sem kúga þær? Hvað gengur fólki til? Í þessari bók fjallar Sæunn Kjartansdóttir á aðgengilegan hátt um ýmiss konar afbrigðilega hegðun fólk og bregður á hana ljósi sálgreiningar. Fram til þessa hefur umfjöllun um sálgreiningu hér á landi verið lítil og einskorðast við kenningar Sigmunds Freud, en í bókinni kynnir Sæunn kenningar ýmissa annarra sálgreina, svo sem Donalds Winnicott og Melanie Klein, auk femínista á borð við Susan Orbach og Nancy Chodorow. „Sálgreining byggist á þeirri forsendu að tilfinningar séu að miklu leyti ómeðvitaðar en stjórni engu að síður gerðum okkar og líðan. En það er ekkert áhlaupaverk að kynnast þeim. Tilfinningar gefa lítið fyrir rök og skynsemi, þær eru fullar af þversögnum og með hjáp varnarhátta get þær brugðið sér í allra kvikinda líki,“ skrifar Sæunn í inngangi. Í bókinni gagnrýnir Sæunn viðteknar skoðanir innan sálfræðinnar, þar sem atferlisfræði hefur mjög ráðið ferðinni, og hún gagnrýnir líka fíknarhugtakið og þær hugmyndir sem liggja að baki hefðbundinni áfengismeðferð hér á landi. Sæunn Kjartansdóttir er sálgreinir og hjúkrunarfræðingur.