Sigrún og Friðgeir : ferðasaga

Abstract

Hvernig í ósköpunum datt henni í hug að sækja um stöðu við þennan fræga spítala? … Hafði Holt læknir kallað hana á sinn fund til þess eins að fá að líta einstakling með svona óbilandi sjálfstraust? … Hún hallar sér að bílrúðunni og hverfur með þessar óvæntu upplýsingar í hausnum inn í marglitan skóginn með fram veginum. Voru þetta slæmar fréttir eða góðar? … Eftir smástund birtist sjórinn á aðra hönd: „alltaf svo fallegur“. Og svo er hún farin að hugsa um annað. Haustið 1940 lögðu tveir ungir íslenskir læknar, hjónin Friðgeir Ólason og Sigrún Briem, af stað áleiðis til Bandaríkjanna í sérnám. Eftir fjögurra ára vist þar og í Kanada snúa þau aftur til Íslands; hann með doktorspróf frá Harvard, hún rétt búin að ljúka kandídatsári sínu með vinnu á barnaspítölum. Dvölin í Ameríku hefur verið ævintýri líkust og svalað miklum metnaði þeirra en það sem öllu hefur breytt og mótað þau meira en nokkur önnur reynsla á þessu langa ferðalagi er fæðing og uppvöxtur þriggja barna þeirra. Sigrún og Friðgeir eru sannarlega tákn um bjartar vonir íslenskra læknavísinda þegar þau stíga um borð í Goðafoss haustið 1944 en þau eru líka foreldrar, sannfærð um hvert mikilvægasta hlutverk þeirra er og verður í náinni framtíð.