| dc.description.abstract |
„Ég var hamrammur, maður í úlfsham, vargur, útlagi. Kraftar mínir voru kraftar úlfsins ... Orðið vargur hefur enda tvöfalda merkingu: Úlfur og guðlaus maður. Eða einfaldlega útlagi. Wargus esto.“ Þessi bók geymir magnaða frásögn af ferðalagi manns inn í heim stjórnleysis, heim sem sumir þekkja, margir óttast en allir ættu að leitast við að skilja betur. Saga Héðins Unnsteinssonar er öðrum þræði sigursaga en líka saga um baráttu við fordóma, kerfið og jafnvel tungumálið sjálft. Hvað er annars að vera heilbrigður? Hvernig losnar maður við „sjúk-dóm“? Vertu úlfur er einlæg, gagnrýnin og hispurslaus frásögn af falli og upprisu manns sem eitt sinn var greindur með geðhvörf. Héðinn Unnsteinsson er með meistaragráðu í alþjóðlegri stefnumótun og stefnugreiningu frá Háskólanum í Bath á Englandi. Hann starfar sem stefnumótunarsérfræðingur í forsætisráðuneytinu og er jafnframt stundakennari við stjórnmálafræðideild Háskóla Íslands. Áður starfaði hann í þrjú ár í heilbrigðisráðuneytinu. Héðinn hefur sinnt geðheilbrigðismálum í tuttugu ár, bæði hér á landi og erlendis, og vann í fjögur ár við geðheilbrigðissvið Evrópupskrifstofu Alþjóðaheilbrigðismálastofnunarinnar (WHO-EURO) þar sem hann tók þátt í stefnumótun Evrópulanda í geðheilbrigðismálum. Á undanförnum árum hefur hann, samhliða starfi sínu, verið alþjóðlegur ráðgjafi í geðheilbrigðismálum og haldið yfir 700 fyrirlestra og skrifað fjölda greina í dagblöð og tímarit. Héðinn var frumkvöðull Geðræktarverkefnisins og Geðorðanna 10. |
is |
