Flökt íslensku krónunnar

Abstract

Því er oft haldið fram að flökt íslensku krónunnar sé meira en annarra gjaldmiðla. Í þessari grein er litið nánar á þennan samanburð og lagt mat á hvort þessi fullyrðing eigi við rök að styðjast. Í fyrsta lagi verða breytileiki og flökt krónunnar skoðuð í sögulegu ljósi og borin saman við gjaldmiðla landa með svipuð þjóðhagsleg einkenni. Í öðru lagi verða væntingar markaðsaðila um framtíðargengissveiflur skoðaðar með sérstakri áherslu á íslenska valréttarmarkaðinn, sem er í örri þróun. Í þriðja lagi er einblínt á að skýra mögulegar ástæður gengisflökts. Skoðað er tímabilið eftir að krónan var sett á flot frá apríl 2001 til mars 2008. Niðurstöðurnar sýna að meðalflökt krónunnar er í meira lagi meðal gjaldmiðla þróaðra ríkja en töluvert minna en flökt hávaxtagjaldmiðla nýmarkaðsríkja. Það kemur væntanlega ekki á óvart að flökt krónunnar hafi verið yfir meðallagi á árunum 2006-2008 í kjölfar mikils ójafnvægis í hagkerfinu. Flökt hennar hefur verið einstaklega mikið það sem af er þessu ári. Þegar litið er fram á við mun flökt krónunnar líklega vera mikið á meðan þjóðarbúskapurinn leitar jafnvægis en þá má vænta þess að úr því dragi og það nálgist sögulegt meðaltal eftir því sem aukið jafnvægi kemst á efnahagslífið, fjármálaóvissa minnkar og vaxtamunarviðskipti dragast saman í kjölfar lækkandi stýrivaxta.