Stöðugleiki í forystu menntunar nemenda af erlendum uppruna : tilvikslýsingar úr þremur grunnskólum

Abstract

Í þessari grein segir frá áherslum í stjórnun í þremur grunnskólum sem voru rannsakaðir. Til að draga upp mynd af stjórnunarlegum áherslum var hugtak Hargreaves og Fink (2006) um stöðugleika í forystu (e. sustainable leadership) lagt til grundvallar. Einkum var horft á undirhugtakið umskipti (e. succession) með arftökum eða eftirmönnum sem vísar til þess að viðhalda eða efla forystu sem er til staðar á tilteknu sviði eða breyta um áherslu. Gögnum var safnað með viðtölum við skólastjóra, umsjónarmenn náms fyrir nemendur af erlendum uppruna og kennara sem höfðu með kennslu þeirra að gera, svo sem sérgreinakennara og umsjónarkennara. Í skólunum þremur var hlutfall nemenda af erlendum uppruna milli 20 og 30% af heildarfjölda nemenda. Greining viðtalanna leiddi í ljós þrjár myndir. Í einum skólanna kom fram sterk áhersla á samstarf, þ.e. stjórnunarhætti sem byggðust á samráði um að efla það sem vel gekk í málefnum nemenda af erlendum uppruna og viðhalda því. Í öðrum skólanum höfðu skólastjóraskipti verið tíð og ýmis almenn vandamál í starfsemi skólans sem kröfðust úrlausnar. Stjórnun og forysta í námi fyrir nemendur af erlendum uppruna var að mestu bundin við umsjónarmann námsins og hann var lítt tengdur við yfirstjórn og kennara skólans. Enn önnur mynd birtist af þriðja skólanum. Þar hafði áhersla á fjölmenningarlega starfshætti verið talsvert lengi við lýði. Skólastjórinn var mjög áhugasamur um fjölmenningarlega starfshætti en hefði mátt fylgja þeim betur eftir að mati kennara. Aðstæður í þessum skóla voru sérstakar þar sem mikill fjöldi starfsfólks var við starfslok. ...