Blöndulón : vöktun á grunnvatni, gróðri og strönd : áfangaskýrsla 2004

Abstract

Árið 2004 var haldið áfram rannsóknum fyrir Landsvirkjun á grunnvatnsstöðu, gróðurframvindu og strandmyndun við Blöndulón en þær hafa staðið samfellt frá 1993. Árið 2004 var hlýtt við Blöndulón og árssveifla í lóninu með minnsta móti. Með hlýnandi veðurfari undanfarin ár hefur dregið úr árssveiflu vatnsborðs lónsins. Sumarið 2004 náði vatnsborð yfirfallshæð í byrjun ágúst og var lónið á yfirfalli í liðlega tvo mánuði. Grunnvatnsstaða var há við lónið að hausti og lík því sem áður hefur mælst eftir að lónið hefur verið lengi á yfirfalli. Mælingar úr síritandi grunnvatnsmælum staðfestu að vatnsborð lónsins hefur mikil áhrif á grunnvatnsstöðu upp af því og ákvarðar árstíðabundnar sveiflur. Fimmtán ný snið voru sett niður með strönd lónsins vorið 2004 til mælinga á rofi úr bökkum. Sniðin voru mæld aftur að hausti. Að meðaltali hörfuðu bakkar um 0,25 m yfir sumarið 2004, en rofið nam 0–1,19 m eftir stöðum. Mest var rofið á vesturströnd lónsins og er það rakið til austan stórviðris í september. Sandfok úr fjörum var kannað og kortlagt. Sumarið 2004 fundust merki um nýtt sandfok á land á fjórum stöðum í víkum með vestur- og norðurstönd lónsins. Flatarmál sanddreifar ofan fjöruborðs var 0,09–0,25 ha. Sandur hefur áður fokið upp á sömu stöðum. Sandfokið 2004 var fremur lítið miðað við fyrri ár.